آخر قصيدة لهشام الجخ .. مكملين

[Basil Abdallah]

بسم الله الرحمن الرحيم

احنا نزلنا ليه ؟؟

مكملين

للي مش فاهمين نزولنا



للى مش فاهمين نزولنا .. للى معاشوش ظلمنا ولا قهرنا ولا حسوش نزول



للى مداقوش مر جوعنا .. اللى ماناموش فى الشوارع كالدبايح



كملوا في الليل عشاهم م الصفايح ..



للى مش فاهمين مهانة الرجال

قهر الرجال ..

للى بيقولوا علينا إننا حبة عيال ..

احنــا مش حبة عيال .



احنا شوفنا النيل بينشف فى البيوت

واما يجرى ...

يتفرش حمام سباحة فى قصر باشا



مستكترين فيا الغضب ..

مانا كنت غرقان فى البشاشه



كنت راضى ببوق مايه واقول دى هنات

كنت ببكى فى القصايد ..

كنت بشتم فى القصايد ..

تتقطع ايدى اما قولت "حبيبتى ماتت"



للى مش فهمين نزولنا فى الشوارع ..

احنا بندور على الحلم اللى ضايع ..

احنا جرينا النفس فى عروق عيالنــا

يكبروا فاهمين حاجات مافهمنهاش ..

اقبل انى اعيش عشان حلم وقضية ..

بس ماقبلشى انى عمرى يضيع بلاش

ما احنا سيبنلكوا البلد مانصفتوهاش



ماتلوموش على اللى اتعجبن فى المعجنه واللى اتظلم

واذا كنتوا فاكرينا غنم .. على رزقكم أنا جِدْى فاق

فاكرين زمان حذرتكم

مستنى ايه من طفل رَبُّوه بالزعاق غير المشاكل و الخناق ؟؟

إذَا كنتوا فاكرينا غنم

على رزقكم أنا جِدْى فاق





للى مش فاهمين نزولنا فى الشورع ..

الحكومة نزلتنا ف الشوارع

الحكومة عودتنا على الشوارع

بيتتنا فى الشوارع

نيمتنا فى الشوارع

الحكومة سكّرت على نفسها كل البيبان

خوفتنا من البيبان ..

فاترمينا كلنا فى حضن الشوارع

اكتر مكان لقيناه امان ..

للى خايفين على البلد لحسن تموت

ماتخافووووش

الموت سكوت ..

واحنا مش فى الخطه اصلا ان بكرة يكون سكوت .. !!



احنا شايلين حملنا ومكملين ..

بكرة بيشاور علينا واحنا مش مستعجلين

ما احنا لينا كام سنه متكتفين

صابحين فى طين .. نايمين فى طين

احنا بنأسس بلد تسمع شكاوى المظلومين

نشتغل نلقى عرقنا قصاد عينينا

مش فى جيب النصابين

نشتكى نلقى الودان اللى تسمع

شكوة الناس الغلابه الطيبين



احنا بنشكل بلد لاهى خايفة من صوت الاذان ولا خايفة من ان الكنائس تتبنى

احنا بنشكل وطن عافيان غني

مش وطن يخدم 15 نفر ويبات جعان !!

احنا مش عاوزين وطن مزلول مهان

"المصرى مش لايقة عليه كلمة مهان"



يقولك احنا عملنا فوضى

طب احنا بردوا عملنا فوضى !!

دا احنا كنا بنتجلد ونعيش ونرضى

واحنا كنا بنتسرق ونعيش ونرضى

كانت الاسعار بتغلى وكنت برضى

والشرطة بتفتشنى عادى

فى اى وقت فى اى حته بدون مناسبة

وكنت برضى ..

والانتخاب من سن كام لسن كام "معرفشى ليه"

وكنت برضى ..

جاى انهردة تقولى احنا عملنا فوضى !!

طب فوضى فوضى !!



ماسورة الغاز بتقفلها لصعيد بلدك وتل ابيب بتفتحها

مسورة الغاز بتقفلها على ولادك وللاعداء بتفتحها

وناس شقيانه طول اليوم عشان لقمه ..

وغالى ياخدها على الجاهز .. اللهى يارب يطفحهــا

وناس تسكن قصور بالدور .. وناس الجوع بيدبحها

وناس بتموت فى الميادين فدى الثوره ...

وناس خايفة على مشاعره لنجرحها

ياخى ......



احنا هانكمل وهانزق البيبان

يارب انت المستعان

واللى بيقولوا علينا مغيبين ومسطحين وبوابين ومعفنين ومنتنين وبلطيه وماجورين و مهجورين

خليهم براحتهم .. احنا بردوا مؤدبين

ومسالمين

بس احنا بردوا "مكملين"

#شبكة_انكور_التطويرية​