دكتور السيد عثمان السيد....والله يا روحي ومناي

[Basil Abdallah]

بسم الله الرحمن الرحيم

والله يا روحي ومناي

............................................



والله..يا روحي ومَناي..

يوم أنفض الدنيا..وأجيك

أنفض رماد حزني وأشوف..

قدَامي ضل الشوق رمي..

وأنا وانتي في فد عنقريب..

ضحكاتنا لا حد السما

وأنا يا ام حجول..

زي ريشه في عصف الرياح

ما بين حجاك..والليل أتوه..

لامن يفرقنا الصباح..

وكلام يطول..

لي الليله في يوم ما انتهي..

لا يوم وصل حدَك غَناي

والله يا روحي ومناي..

دفَيق تمرنا الما نجض..

يبقالي كان مشتاق اليك

وانا برضو كنت قبل سنين..

يادوبي شافع وبشتهيك..

بي حس طفل ما غبَا يوم

ما يخلق الاعذار يجيك..

سُلفة كتاب

شحدة قلم

أو أىَ حاجه تجيبني ليك

يا سارقه قلبى من الصغر..

يا ساكنه في نبضي ودماي..

والله..يا روحي ومناي..

لحظة أودعكم وأفوت..

وانا بين احنَس في خُطاي

كان أقدر أمشي وبين أموت..

وكتين مشيت..

وانا وانتي ضارتنا البيوت..

تاوقت في الواطه ولقيت..

أتر الخطاوي الجات معاي

راحت مع الريح... وانكسر..

جوَايا خاطري..وكت لقيت..

ضُلَي انسرق..برَاحه راجع من وراى..

والله..يا روحي ومناي..

ضحكات عيونك في البلد..

كانت فرح ما ليهو حد..

تدخلني من باب المروق..

تمرق رويحتي من الجسد..

تتماهي في صلواتي شوق

تبقالي زي حبل المسد..

حبلاُ يجرجرني واجيك

شايل حطب ناري وبكاي..

والله يا وجعي ومناي..

انا ما حصل

حبيت غيرك قط بشر..

لا خنت يوم قصَة هواك

لا قلبي في دربك فتر..

ما البيني بينك قالو حُب

لكين وحات عينيك قدر..

قدر اني أعيشك..أو أموت..

ما الدنيا غيرك يا قمر

ما بتسوي صفحه..ولا حرف..

في دفتر أشواقك معاي

والله يا روحي ومناي..

أنا بي تواريخي المعاك

لي الليله..صفق الشوق يحت..

شافع الرعيه الكان زمان..

سارح ورا العنزات تحت..

صورتك معاي..شقيش أميل

منحوته في الواحات نحت..

قصب السواقي وكت نشف..

سوَيتو قيثاره وبقيت...

أقعد قصاد بيتكم براي

أعزف حروف اسمك غنا

غنا من شراييني ودماي

وانا حالى من حال البلد

ما عندي غير شعري وغناي

أهديهو ليك حُب للابد

يا حلوه..في مزمار وناي...

#شبكة_انكور_التطويرية​